Búgin 15-oktyabr kúni Berdaq atındaǵı Qaraqalpaq mámleketlik universiteti Ekonomika fakulteti tárepinen «Ilim hám ekonomikanıń óz-ara baylanısı–modernizaciyalıq hám innovaciyalıq rawajlanıw tiykarı» atamasında xalıqaralıq ilimiy – ámeliy konferenciya ótkerildi. Onda ilimpazlar, professor-oqıtıwshılar, student-jaslar hám Zoom platforması arqalı sırt el joqarı oqıw orınlarınan miymanlar qatnastı. Konferenciyanı universitettiń Xalıqaralıq birge islesiw boyınsha prorektorı T.Nurımbetov ashıp berdi hám alıp bardı. Ol dáslep konferenciyanıń saltanatlı ashılıwı menen universitet rektoratı atınan qızǵın qutlıqlap, konfernciyanıń maqseti hám wazıypaları haqqında aytıp ótti.
Bunnan soń, Oliy Majlis Senatınıń Aral boyı regionın rawajlandırıw máseleleri hám ekologiya komiteti baslıǵı Boriy Alixanov, Oliy Majlis Nızamshılıq palatası deputatı L.Seytova, AQSh Xartuik kollejdi “Biznesti basqarıw hám buxgalteriyalıq esap” kafedarsı baslıǵı, PhD, professor Aaron Rae Stephens, Ekonomika ilimleriniń doktorı, professor, FGBOU VO «G.V. Plexanov atındaǵı Rossiya ekonomika universiteti»niń statistika kafedrası baslıǵı. Rossiya tábiyiy ilimler akademiyasınıń haqıyqıy aǵzası N.Sadovnikovalar óz bayanatları menen qatnastı.
Sonıń menen birge, konferenciyada «Aral boyı aymaǵında isbilermenlikti rawajlandırıwda Qaraqalpaqstan Respublikasında 2024-jıl 19-20-avgust kúnleri Prezidentimiz Sh.Mirziyoev hám isbilermenler ushırasıwındaǵı ózgerislerdiń áhmiyeti», “Oliy taʼlim va ishlab chiqarishning oʻzaro samarali integratsiyasini taʼminlashda tadbirkorlik universitetlarining tutgan roli va ahamiyati” temalarında bayanatlar qılındı.
Konferenciyadan gózlengen tiykarǵı maqseti ilim nátiyjelerin ekonomikaǵa nátiyjeli engiziw, ekonomikanıń túrli tarmaqlarında ilimiy izertlewler hám qollanbalar tiykarında innovaciyalardı engiziw arqalı turaqlı rawajlanıwdı támiyinlewden ibarat boldı. Bul konferenciya ilimiy izertlewler hám ekonomikalıq rawajlanıw arasındaǵı óz-ara baylanıstı bekkemlew arqalı modernizaciyalaw hám innovaciyalıq rawajlanıwǵa erisiw jolların dodalawdı maqset etken.
QMU baspasóz xızmeti
