Berdaq atındaǵı Qaraqalpaq mámleketlik universiteti Tariyx fakulteti Sociallıq pánler kafedrasında Qaraqalpaqstan Respublikası «Jaslıq» aymaqlıq izertlew orayı baslamasında «Jaslardıń ruwxıy dúnyası – problemalar hám usınıslar» atamasında dóngelek stol átirapında sáwbet ótkerildi. Onda dekan orınbasarları, professor-oqıtıwshılar, student-jaslar hám Ózbekstan jaslar awqami Qaraqalpaqstan Respublikalıq Keńesi Málimleme xızmeti bólimi baslıǵı B.Qoshjanovlar qatnastı. Ilajdı Qaraqalpaqstan Respublikası «Jaslıq» aymaqlıq izertlew orayı direktorı, f.i.d., professor A.K.Berdimuratova ashıp berdi. Ilaj Qaraqalpaqstan Respublikası «Jaslıq» aymaqlıq izertlew orayı tárepinen orınlanıp atırǵan «Jámiyettiń innovaciyalıq rawajlanıw basqıshında jaslardıń ideologiyalıq qáwipsizligin támiyinlew» atamasındaǵı joybar kóleminde ótkerildi.
Bunnan soń, qánigeler hám jaslar belsendilerine izertlew orayı qanigeleri tárepinen ótkerilgen «Jaslardıń qádriyatlar sistemasındaǵı transformaciyalar (Qaraqalpaqstan Respublikası jasları mısalında)» atamasındaǵı izertlew jumısı nátiyjeleri usınıs etiledi. Izertlew orayı qánigesi sociologiya ilimleri kandidatı, doc. X.Kamalova, «Jaslardıń qadriyatlar sistemasındaǵı transformaciyalar (Qaraqalpaqstan Respublikası jasları mısalında)», «Jaslardıń dúnyaǵa kóz-qarasına tásir etiwshi faktorlar» (sistemalı analiz) temasında filosofiya ilimleri boyınsha PhD A.Baymurzaevlar maǵlıwmat berdi.
Sonıń menen birge ilajda M.Maxsetova Jaslar máselesinde shańaraq hám tárbiyanıń áhmiyeti, Q.Yusupov jámlespegen jaslardıń belsendiligin elede asırıw, R.Mámbetkarimov jaslar arasındaǵı massalıq mádeniyat hám olardıń keri tásirleri haqqında óz pikirlerin bildirdi. Ilaj dawamında Ózbekstan jaslar awqamı Qaraqalpaqstan Respublikalıq Keńesi Málimleme xızmeti baslıǵı B.Qoshjanov jámlespegen jaslar haqqında maǵlıwmat berdi. Tiykarǵı maqseti: jaslar, ruwxıylıq hám jámiyetlik qatnasıqlar máseleleri menen shuǵıllanıwshı qánigeler hám jaslar belsendileri qantasıwında jaslardıń dúnyaǵa kóz-qarasında júz berip atırǵan unamlı hám qáweterli tendenciyalar, jaslar arasında salamat ruwxıy ortalıqtı jaratıw bolıp, bul boyınsha pikir hám usınıslar tıńlandı.
