Búgin, 25-oktyabr kúni Túrkiya Respublikasınıń Pamuqqala universiteti Social-gumanitar pánler fakulteti túrk tili hám ádebiyatı kafedrasınıń professorı, belgili tyurkolog ilimpaz Jeyhun Vedat Uyǵur Berdaq atındaǵı Qaraqalpaq mámleketlik universiteti rektorı Axmed Reymov penen ushırastı. Ushırasıwda dáslep rektor Axmed Reymov sózge shıǵıp, búgingi kúnde Qaraqalpaq mámleketlik universiteti Túrkiya Respublikasınıń bir neshe joqarı oqıw orınları menen óz-ara birge islesiw alıp barıp atırǵanlıǵın ondaǵı jetiskenlikleri jáne ilimiy hám oqıw processlerindegi jańalıqlar haqqında aytıp ótti.
Sonday-aq, ushırasıw sheńberinde Pamuqqala universiteti menen aldaǵı waqtları birge islesiwdi rawajlandırıw, atap aytqanda professor-oqıtıwshılar hám studentler almasıwı baǵdarlamaların keńeytiw, túrkologiya hám túrkiy tiller boyınsha birgeliktegi ilimiy joybarlardı ámelge asırıw, monografiya hám ilimiy qollanbalar basıp shıǵarıw máseleleri hár tárepleme kórip shıǵıldı. Óz gezeginde, professor Jeyhun Vedat Uyǵur eki joqarı oqıw ornı arasındaǵı bunday baylanıslar tek ǵana bilimlendiriw hám ilimiy jumıs tarawında emes, al mádeniy miyrastı qásterlep saqlaw hám túrkiy xalıqlar tariyxın tereń úyreniw baǵdarında da úlken áhmiyetke iye ekenin atap ótti.
Ushırasıw dawamında birge islesiwdiń perspektivaları, sonıń ishinde, ilimiy konferenciyalar shólkemlestiriw, studentler ushın izertlew hám ámeliyat baǵdarlamaların keńeytiw jáne de pedagog xızmetkerler arasında tájiriybe arttırıw baǵdarlamaların jolǵa qoyıw sıyaqlı baslamalar boyınsha anıq usınıslar bildirildi. Sonıń menen birge, ushırasıwda eki universitet arasında basılıp shıǵarılatuǵın kitaplar arqalı ilimiy hám mádeniy baylanıslardı jáne de bekkemlewge kelisip alındı. Ushırasıw juwmaǵında eki tárep keleshekte óz-ara birge islesiwdi dawam ettiriwge tayar ekenin jáne bir márte atap ótti. Bul birge islesiwden gózlengen maqset – ilim hám bilimlendiriw tarawındaǵı aldınǵı tájiriybelerdi almasıw hám jas áwladtı túrkologiya baǵdarında tereń bilim hám kónlikpelerge iye qánigeler sıpatında tayarlawdan ibarat.
QMU baspasóz xızmeti
