Usı ótip atırǵan hápte jurnalistika kafedrası ushın haqıqıy mánawiyat háptesi boldı desek asırıp aytqan bolmaymız. Yaǵnıy usı háptede qaraqalpaq xalqınıń kórnekli wákili hám klassik shayır Berdaq babamızdıń tuwılǵanına 197 jıl tolıw múnásibeti menen ótkerilgen hám «1-dekabr qaraqalpaq tiline mámleketlik til biyligi berilgen kún» múnásibeti menen ótkerilgen ilajlarda kafedra professor-oqıtıwshıları belsene qatnasqan bolsa, sonıń menen birge Ózbekstan Respublikası Prezident Administraciyasınıń №03-RA 1-5357-sanlı arnawlı tapsırması hám ÓzRJBIMniń 122-sanlı buyrıǵı tiykarında universitet tárepinen belgilep berilgen respublikamız MPJ hám mekteplerinde «Máripat taratıp» hám «Mánáwiyat hápteligi» joybarların shólkemlestiriwge belsene qatnastı. Atap aytqanda, bul boyınsha Jurnalistika kafedrasınıń professor-oqıtıwshıları, doktorantlar, magistrantlar, jetekshi jaslar hám belsendi studentler qatnasıwında Kegeyli rayonındaǵı «Nurlı bostan» MPJ hám sol aymaqda jaylasqan 9-14-sanlı mekteplerde ruwxıylıq-aǵartıwshılıq ilajların kóterińki ruwxta alıp bardı.
Mine usınday ilajlardıń biri búgin rayondaǵı 14-sanlı mektepte ótkerildi. Ilaj dawamında Jurnalistika kafedrası baslıǵı J.Marziyaev, kafedra professorı B.Palwanov, kafedra docenti E.Jarimbetov hám jurnalistika tálim baǵdarınıń belsendi studenti A.Nurlıbaevlar jaslarǵa bilimlendiriw tarwında mámleketimizde ámelge asırılıp reformalar hám olardıń áhmiyeti, jaslarǵa jaratıp berilip atırǵan imkaniyatlar haqqında keń túrde aytıp ótti. Sonıń menen birge, jaqında ullı klassik shayırlarımız Ájiniya Qosıbay ulınıń 200 jıllıq, Berdaq Ǵarǵabay ulına 197 jıl tolıwı, 1-dekabr qaraqalpaq tiline mámleketlik til biyligi berilgen kúni múnásibetleri ótkerilip atırǵan ilajlar boyınsha da keń túrde maǵlıwmatlar berip ótti. Ilajdıń ekinshi basqıshında viktorina hám sport oyınlarına keń orın berildi. Onda jaslar arasında soraw-juwap hám shaxmat-shashka jarısları shólkemlestirildi. Bunda soraw-juwapqa belsendi qatnasqan oqıwshılarǵa hám sport jeńimpazlarına kafedra professor-oqıtıwshıları tárepinen tayarlanǵan bahalı sawǵalar inam etildi. Ilaj sońında bunday ilajlardı bunnan bılay da tez-tez shólkemlestirip turıwǵa, sonday-aq professor-oqıtıwshılar menen mektep oqıwshıları qatnasında Respublikamız boylap media-turlardı shólkemlestiriwge de kelisip alındı. Ilaj barlıq qatnasıwshılarda úlken tásir qaldırdı.
A.NURLÍBAEV
QMU «Málimleme xızmeti hám jámiyetshilik penen baylanıslar» tálim baǵdarınıń 3-kurs stedenti
