Búgin Nókis qalası orayındaǵı «Xalıqlar doslıǵı» maydanında ornatılǵan jańa jıl shırshası átirapında Berdaq atındaǵı Qaraqalpaq mámleketlik universiteti tárepinen «Jıl studenti 2024» tańlawı boyınsha universitet basqıshı jeńimpazların sıylıqlaw máresimi bolıp ótti.

Ilajda universitet rektorı A.Reymov qatnasıp, student-jaslardı jańa jıl bayramı hám búgingi qolǵa kirgizgen tabısları menen qutlıqlap, mámleketimiz tárepinen berilip atırǵan keń imkaniyatlardı ayrıqsha atap ótti. Sonday-aq, bul imkaniyatlardan aqılǵa uǵras paydalanıw, óz ústinde turaqlı islesiw hám keleshekte Watanımızdıń rawajlanıwı jolında pidákerlik penen xızmet etiw zárúr ekenligin aytıp ótti.

Bunnan soń, «Jıl studenti 2024» tańlawı boyınsha universitet basqıshı jeńimpazları hám jámiyetlik jumıslarda belsendilik kórsetip júrgen bir qatar student-jaslar xoshametlendi. Ilaj mádeniyat xımetkerleri tárepinen tayarlanǵan koncert baǵdarlaması menen dawam etti. Bunday tańlawlar jas áwladtıń intellektuallıq potencialın arttırıw, olardıń jetekshilik qábiletlerin rawajlandırıwǵa xızmet etpekte.

Maǵlıwmat ushın; «Jıl studenti» respublikalıq tańlawınıń universitet basqıshında student-jaslar 7 nominaciya boyınsha qatnasıp, bunda úzliksiz (akademiyalıq tánepissiz) kúndizgi bilimlendiriw túrinde oqıp atırǵan 2-3 hám 4-kurs studentleri arasında qatnasıwshılardıń usı jılda ózleri tárepinen jaratılǵan ilimiy jumıslar, oylap tabılıwlar, innovatciyalıq ideyaları, ratsionalizatorlıq usınıslar, shólkemlestiriwshilik qábileti hám usı tiykarda ózi shólkemlestirgen ilajlar, qolǵa kirgizgen tabısları, olardıń jańalıǵı, ilimiy áhmiyetliligi tóreshiler tárepinen kórip shıǵılıp, múnásip bahalandı.

QMU baspasóz xızmeti