Búgin, 6-yanvar kúni Berdaq atındaǵı Qaraqalpaq mámleketlik universitetinde Qurılıs, Sanaat texnologiyası, sonday-aq, Geografiya hám tábiyǵıy resurslar fakultetleri professor-oqıtıwshılarınıń 2024-jıldıń juwmaǵı hám jańa 2025-jılǵa mólsherlengen rejeleri boyınsha esabatları tıńlandı. Dáslep Qurılıs fakulteti dekanı T.Uzaqov, Sanaat texnologiyası fakulteti dekanı R.Qurbaniyazovlar bunnan soń, Geografiya hám tábiyǵıy resurslar fakulteti dekanı N.Embergenovlar fakultetler tárepinen ótken jılı ámelge asırılǵan jumıslar, erisilgen nátiyjeler hám sheshimin kútip atırǵan mashqalalar haqqında tolıq málimleme berdi.
Májiliste universitettiń oqıw isleri boyınsha prorektor O.Duysenbaev qatnasıp, 2024-jıl ushın belgilengen rejelerdiń orınlanıwı jáne de ilimiy-izertlew jumıslar, xalıqaralıq birge islesiw hám studentlerdiń ámeliy kónlikpelerin rawajlandırıw baǵdarında ámelge asırılǵan ilajlardı sınǵa aldı. Atap ótilgenindey, 2024-jılǵa mólsherlengen rejalerdiń ayırım bólimleri tolıq ámelge asırılmaǵanı hám bul processlerde júzege kelgen kemshilikler, atap aytqanda, ilimiy-izertlew jumıslarınıń nátiyjeliligin arttırıw, xalıqaralıq birge islesiwdi jáne de keńeytiw hám studentlerdiń teoriyalıq bilimlerin ámeliyat penen integraciyalaw boyınsha ámelge asırılǵan jumıslar dodalandı.
Májilis dawamında bar mashqalalardı saplastırıw boyınsha tiyisli ilajlar rejesin islep shıǵıw zárúrligin, sonday-aq, keleshekte bilimlendiriwdiń sapasın arttırıw, ilimiy joybarlar sanın kóbeytiw hám studentlerdiń bilimin bunnan bılay da bekkemlew boyınsha hár bir fakultetke anıq wazıypalar belgilep berildi. Májilis juwmaǵında rejelestirilgen maqsetlerdi óz waqtında hám sapalı ámelge asırıw, bar kemshiliklerdi saplastırıw ushın professor-oqıtıwshılar fakultet jámáátiniń juwapkershiligin arttırıw áhmiyetli ekenligi ayrıqsha atap ótildi.
QMU baspasóz xızmeti
