Aldın xabar bergenimizdey, Berdaq atındaǵı Qaraqalpaq mámleketlik universitetinde qısqı dem alıs waqıtlarınan nátiyjeli paydalanıw maqsetinde professor-oqıtıwshılar ushın arnawlı oqıw seminarları shólkemlestirilmekte. Usı tiykarda ótken 2024-jıldıń 26-dekabr kúninen baslap, universitettiń barlıq fakultet professor-oqıtıwshılarına seminarlar ótkerilip, bilimlendiriw procesin jetilistiriw, ilimiy-izertlew jumısın rawajlandırıw hám pedagogikalıq jumısqa innovaciyalıq qatnaslardı engiziw máseleleri dodalanbaqta.

Onda universitettiń, jaslar máseleleri hám ruwxıy–aǵartıwshılıq isleri boyınsha prorektorı S.Alawatdinov, xalıqaralıq birge islesiw boyınsha prorektor T.Nurımbetov hám bólim baslıqlar tárepinen professor-oqıtıwshılarǵa ilimiy-izertlew jumısların nátiyjeli shólkemlestiriw, oqıw-metodikalıq jumıstı jetilistiriw, jas áwladtı tárbiyalawda zamanagóy pedagogikalıq qatnaslardı qollanıw, sonday-aq, universitettiń xalıqaralıq reytingin arttırıw baǵdarlarında maǵlıwmatlar berilmekte.

Seminar dawamında bilimlendiriwdiń sapasın jaqsılawǵa qaratılǵan jańa metodologiyalıq qatnaslar, materiallıq-texnikalıq bazanı bekkemlew ilajları jáne jınayashılıq hám huqıqbuzarlıqlardıń aldın alıw baǵdarındaǵı baslamalar dodalanıp, ilimiy-izertlew, oqıw-metodikalıq, ruwxıy-aǵartıwshılıq boyınsha birge islesiwdi kúsheytiw hám xalıqaralıq baylanıslardı keńeytiw boyınsha usınıslar bildirildi.

Bul seminarlar universitettiń bilimlendiriw sapasın jáne de arttırıw hám zamanagóy bilimlendiriw standartların engiziwde úlken áhmietke iye bolıp, professor-oqıtıwshılar jańa bilimlerdi ámeliyatqa engiziw arqalı studentlerge sapalı bilim beriwge jáne de keń imkaniyat jaratpaqta.

QMU baspasóz xızmeti