Usı jıldıń 10-yanvar kúni Berdaq atındaǵı Qaraqalpaq mámleketlik universitetinde, universitet rektoratı hám kásiplik awqamı komiteti tárepinen 14-yanvar – Watan qorǵawshıları kúni bayramı hám Ózbekstan Respublikası Qurallı Kúshleri dúzilgeniniń 33 jıllıǵı múnásibeti menen sportıń stol tennis túri boyınsha jarıs ótkerildi. 

Jarısta universitettiń barlıq fakultet professor-oqıtıwshıları hám xojalıq bólimi xızmetkerleri belsene qatnastı. Ilaj Watan qorǵawshıları kúni bayramınıń áhmiyetin jáne de arttırıw, xızmetkerler arasında salamat turmıs tárizin úgit-násiyatlaw hám fizikalıq shınıǵıw menen turaqlı shuǵıllanıwǵa qızıǵıwshılıq oyatıw maqsetinde shólkemlestirildi.

Jarıs qızǵın bellesiwlerge bay bolıp, onda qatnasıwshılar ózleriniń sportqa bolǵan sheberliklerin kórsetti. Jarıs juwmaǵında universitettiń kásiplik awqamı komiteti baslıǵı A.Alliyarov sózge shıǵıp, bársheni bayram menen universitet rektoratı atınan qızǵın qutlıqladı hám barlıq komandalarǵa óz minnetdarshılıǵın bildirdi.

Bunnan soń, jeńimpazlarǵa universitet rektoratı hám kásiplik awqamı komiteti tárepinen tárepinen estelik sawǵalar tapsırıldı. Bunday sport ilajları xızmetkerler arasında watandı súyiwshilik sezimin arttırıw, salamat turmıs tárizin úgit-násiyatlaw hám fizikalıq shınıǵıw menen turaqlı shuǵıllanıwǵa tiykar jaratadı.

QMU baspasóz xızmeti