2025-jıl Ózbekstan Respublikasında Qorshaǵan ortalıqtı qorǵaw hám «jasıl» ekonomika jılı dep járiyalanıwı múnásibeti menen búgin, 23-yanvar kúni Berdaq atındaǵı Qarqalpaq mámleketlik universiteti Biologiya fakultetinde qorshaǵan ortalıqtı qorǵaw hám resurslardan aqılǵa uǵras paydalanıw temasında ashıq sáwbet ótkerildi.

Onda professor-oqıtıwshılar, doktorantlar, magistrantlar student-jaslar hám ǴXQları wákilleri qatnastı. Ilajdı Biologiya fakulteti dekanı Ya.Ametov ashıp berdi hám alıp bardı. Ilaj dawamında qorshaǵan ortalıqtı qorǵawdıń áhmiyetli máseleleri, ekologiyalıq turaqlılıqtı támiyinlewde ilimniń ornı, tábiyǵıy resurslardan aqılǵa uǵras paydalanıw boyınsha ámelge asırılıp atırǵan ilajlar keńnen dodalandı.

Ilajda shıǵıp sóylegen fakultet professor-oqıtıwshıları M.Mátmuratov, A.Kidirbaevalar mámleketimizde ekologiya hám «jasıl» ekonomika tarawında alıp barılıp atırǵan reformalar haqqında sóz etip, bársheni bul baǵdarda belsendi bolıwǵa shaqırdı. Sonday-aq, ilajda doktorant hám magistranlar óz ilimiy izleniwleriniń nátiyjeleri menen bólisip, ekologiyalıq mashqalalardı sheshiwde innovaciyalıq kózqaraslardıń áhmiyeti haqqında pikir bildirdi.

Studentler tárepinen berilgen sorawlar dodalanıp, olarǵa qorshaǵan ortalıqtı saqlaw hám ekologiyalıq mádeniyattı arttırıw boyınsha usınıslar berildi. Sonıń emen birge, ilaj dawamında «jasıl» ekonomika koncepciyasınıń áhmiyeti hám bul baǵdarda alıp barılıwı kerek bolǵan ámeliy jumıslar boyınsha usınıslar alǵa qoyıldı.

Ashıq sáwbet qatnasıwshılardı qorshaǵan ortalıqtı qorǵaw máselelerinde jáne de belsendi bolıwǵa hám bul baǵdarda jańa baslamalar ushın platforma jarattı. Ilaj sońında ekologiyalıq mashqalalardı saplastırıwda jámáátlik háreketlerdiń áhmiyeti jáne bir márte atap ótildi.

QMU baspasóz xızmeti