Búgin 29-yanvar kúni Berdaq atındaǵı Qaraqalpaq mámleketlik universitetiniń Málimleme-resurs orayında qazaq ádebiyatına baylanıslı kitaplar kórgizbesi shólkemlestirildi. Bul ilaj universitet professor-oqıtıwshıları hám studentleri ushın úlken áhmiyetke iye bolıp, milliy ádebiyatqa qızıǵıwshılıqtı arttırıw hám ilimiy sın kózqarastan tallaw kónlikpelerin rawajlandırıwǵa xızmet etedi. Kórgizbede 500 atamadaǵı oqıw hám kórkem ádebiyatlar kórsetildi. Bul kitaplar arasında qazaq ádebiyatınıń klassikalıq hám zamanagóy úlgileri, ilimiy-ádebiy izertlewler hám zamanagóy awdarma shıǵarmaları orın aldı. Sonıń ishinde, 48 awdarma kitaplar arqalı xalıqaralıq ádebiy baylanıslar sáwlelendirilip, túrli xalıqlar ádebiyatınıń qazaq tiline awdarılǵan eń saylandı shıǵarmaları usınıs etildi.
Ilajda universitettiń qazaq tili qánigeligi studentleri hám professor-oqıtıwshıları belsene qatnastı. Olar kórgizbe sheńberinde kitaplar menen jaqınnan tanısıp, jańa maǵlıwmatlarǵa iye boldı. Sonday-aq, ilaj dawamında ádebiyattıń jas áwlad tárbiyasındaǵı ornı, awdarma kórkem óneri hám zamanagóy ádebiy processlerdiń milliy mádeniyatqa tásiri dodalandı. Kórgizbeniń tiykarǵı maqseti studentlerdiń kitapqumarlıq mádeniyatın arttırıw, qazaq ádebiyatınıń eń saylandı shıǵarmaların keńnen úgit-násiyatlaw hám oqıw procesinde paydalanıw imkaniyatların sáwlelendiriwden ibarat bolıp tabıladı. Universitet Málimleme-resurs orayı tárepinen shólkemlestirilgen bul ilaj kitapqumarlıqtı rawajlandırıwǵa qaratılǵan keń kólemli joybarlardıń bir bólegi bolıp, studentler hám oqıtıwshılar ushın ádebiy miyrastı tereń úyreniw hám onnan nátiyjeli paydalanıw imkaniyatların jaratadı.
Ilaj sońında professor-oqıtıwshılar hám student-jaslar tárepinen kitapqumarlıqtı úgit-násiyatlaw, ádebiyat hám awdarma processlerin keńeytiw boyınsha usınıslar berildi. Bunday kórgizbeler universitet jámááti ushın tek ǵana ilimiy-ámeliy áhmiyetke iye emes, al jaslardıń ádebiyatqa bolǵan mehirin arttırıw, olardıń kórkem hám ilimiy oy-pikirin rawajlandırıwda áhmiyetli rol atqaradı.
QMU baspasóz xızmeti
