Qaraqalpaqstan Respublikası Ministrler Keńesi Baslıǵınıń orınbasarı Bayram Ótemuratov basshılıǵındaǵı delegaciya aǵzaları xızmet sapar menen házirde Malayziya mámleketinde bolıp turıptı. Delegaciya quramında Qaraqalpaqstan Respublikası Mádeniyat ministri B.Temirbaev, Sanlı texnologiyalar ministrligi Qaraqalpaqstan Respublikası aymaqlıq basqarması baslıǵı T.Baekeev, Berdaq atındaǵı Qaraqalpaq mámleketlik universiteti rektorı, akademik A.Reymov hám xalıqaralıq birge islesiw boyınsha prorektor T.Nurımbetovlar qatnaspaqta.
Sapardıń dáslepki kúni delegaciya aǵzaları Aziya-Tınısh okeanı texnologiyalar hám innovaciyalar universiteti (APU) jámááti menen ushırasıw ótkerdi. Ushırasıw dawamında studentler almasıw baǵdarlamaların shólkemlestiriw, professor-oqıtıwshılardı stajirovkaǵa jiberiw, sonday-aq, IT tarawı boyınsha birgeliktegi ilimiy-ámeliy joybarlar ústinde islesiw máseleleri hár tárepleme dodalandı. Bul sapar zamanagóy texnologiyalar hám innovaciyalar tarawındaǵı aldınǵı tájiriybelerdi úyreniw, maman kadrlar tayarlaw hám akademiyalıq baylanıslardı bekkemlew ushın áhmiyetli bolıp tabıladı.
Delegaciya aǵzaları tárepinen alǵa qoyılǵan baslamalardan biri studentler almasıw baǵdarlamaların keńeytiw boldı. Bul arqalı Qaraqalpaqstannıń qábiletli jasları APU universitetinde zamanagóy bilim alıw hám ilimiy tájiriybe arttırıw imkaniyatına iye boladı. Sonıń menen birge, professor-oqıtıwshılar ushın tájiriybe almasıw hám mamanlıq arttırıw baǵdarlamalarıda kórip shıǵıldı.
Yaǵnıy bunda APU universitetinde qánigeligin arttırǵan pedagoglar zamanagóy bilimlendiriw metodikaların ózlestirip, óz bilim hám tájiriybelerin jergilikli joqarı bilimlendiriw sistemasına qollanıwı rejelestirilmekte. Sóylesiwler waqtında IT tarawı boyınsha birge islesiw ayrıqsha itibarǵa alındı. Bunda Malayziya universiteti hám Qaraqalpaqstan Respublikası joqarı oqıw orınları sanlı texnologiyalar, programmalıq támiynat jaratıw, xalıqaralıq IT konferenciyaları hám startap joybarlarında qatnasıw imkaniyatları haqqında sáwbetlesiwler alıp bardı.
Maǵlıwmat ushın; Asia Pacific University of Technology & Innovation (APU) Malayziyanıń jetekshi jeke menshik universitetlerinen biri bolıp, QS reytinglerinde joqarı orınlardı iyelep kelmekte. 2025-jılǵı QS Jáhán universitetleri Reytinginde APU 611-620-orınlardı iyeleydi. Sonday-aq, APU QS tárepinen «5 Stars Plus» reytingine iye bolǵan Malayziyadaǵı birinshi universitet esaplanadı.
QMU baspasóz xızmeti
