Berdaq atındaǵı Qaraqalpaq mámleketlik universitetinde ruwxıylıq hám aǵartıwshılıq tarawı xızmetkerleri, jaslar menen islesiw boyınsha dekan orınbasarları, pedagog-tárbiyashılar hám tyutorlardıń qatnasıwında oqıw seminarı shólkemlestirildi.

Onda Qaraqalpaqstan Respublikası Ruwxıylıq hám aǵartıwshılıq orayı baslıǵı Tatlımurat Atamuratov, Qaraqalpaqstan Respublikası Ruwxıylıq hám aǵartıwshılıq orayı úgit-násiyat toparı aǵzası, Nókis mámleketlik pedagogikalıq institutı docenti Qabıl Mambetovlar óz bayanatı menen qatnastı. Ilajdı universitettiń Jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov ashıp berdi hám alıp bardı.

Seminarda «Milletleraralıq tatıwlıqtı bekkemlew hám diniy keńpeyillikti támiyinlew» jáne de «Bir bolsaq – bir xalıqpız, birlessek – Watanbız!» ilajların úgit-násiyatlaw boyınsha bayanatlar tıńlandı. Bayanashılar mámleketimizde túrli millet wákilleriniń tatıw jasawı, diniy keńpeyillik principlerine ámel etiliwi jámiyettiń turaqlılıǵı hám rawajlanıwınıń áhmiyetli faktorlarınan biri ekenin atap ótti.

Sonday-aq, student-jaslar arasında milliy qádiriyatlardı úgit-násiyatlaw, olardıń ideologiyalıq immunitetin bekkemlew hám hár qıylı unamsız tásirlerge qarsı gúresiw máselelerine ayrıqsha itibar qaratıldı. Seminarda qatnasıwshılar óz pikir-usınısların bildirip, tema boyınsha óz-ara pikir alıstı. Bul ilaj ruwxıy-aǵartıwshılıq jumıslardı jáne de jedellestiriw, student-jaslardıń dúnyaǵa kózqarasın keńeytiw hám olardı jat ideyalardan qorǵaw baǵdarında úlken áhmiyetke iye boldı.