Búgin, 15-fevral kúni, Qıtaydıń Shandong Engineering kompaniyası wákilleri hám Nókis qalasındaǵı One Cloud Akademiyasınıń qıtaylı professorı Su Yuhang Berdaq atındaǵı Qaraqalpaq mámleketlik universitetinde bolıp, bul jerde universitet rektorı, akademik A.Reymov penen ushırastı. Ushırasıwda eki táreptiń ilimiy, bilimlendiriw hám ámeliyatqa baǵdarlanǵan birge islesiwine baylanıslı bir qatar áhmiyetli máseleler dodalandı.
Ushırasıwda, studentler hám oqıtıwshılarǵa jańa bilim hám kónlikpelerdi arttırıw, óz-ara ilimiy almasıwlardı keńeytiw, sonday-aq, eki tárepleme ilimiy joybarlardı ámelge asırıw arqalı jańa nátiyjelerge erisiw máseleleri kórip shıǵıldı. Bunnan tısqarı, Qıtay tájiriybesinen paydalanıp, jańa zamanagóy laboratoriyalardı jaratıw, ilim hám texnologiyalardı rawajlandırıw boyınsha bir qatar usınıslar alǵa qoyıldı.
Bul birge islesiwdi ámelge asırıw, Qaraqalpaq mámleketlik universitetiniń xalıqaralıq ilimiy maydandaǵı ornın jáne de bekkemlew, studentler hám oqıtıwshılarǵa jańa bilimler alıw imkaniyatların jaratıw ushın úlken áhmiyetke iye. Ushırasıw juwmaǵında tárepler keleshektegi birge islesiwdi jáne de rawajlandırıw, ilimiy-izertlew hám bilimlendiriw tarawındaǵı joybarlardı tabıslı ámelge asırıw ushın birgelikte islesiwge kelisip alındı.
