Búgin, 17-fevral kúni Berdaq atındaǵı Qaraqalpaq mámleketlik universitetiniń Arxitektura fakulteti hám de Geografiya hám tábiyǵıy resurslar fakultetinde kiberjınayashılıqtıń aldın alıw máselelerine baǵıshlanǵan úgit-násiyat ilajı bolıp ótti. Bul ilajda professor-oqıtıwshılar, tyutorlar hám student-jaslar qatnastı.

Ilajda universitettiń oqıw isleri boyınsha prorektorı O.Duysenbaev hám jaslar máselesi hám ruwxıy-aǵartıwshılıq isleri boyınsha prorektorı S.Alawatdinovlar shıǵıp sóylep, búgingi kúnde kiberjınayashılıqtıń keń tarqalıp atırǵanı, internet arqalı júz berip atırǵan aldawshılıq, jeke maǵlıwmatlardıń urlanıwı, jalǵan saytlar arqalı paydalanıwshılardıń aldanıwı sıyaqlı qáwip-qáterler haqqında tolıq maǵlıwmat berdi.

Bayanashılar jaslardı internet hám sociallıq tarmaqlardan aqılǵa uǵras paydalanıwǵa, jeke maǵlıwmatların biytanıs shaxslarǵa bermewge, gúmanlı siltemelerge kirmewge hám kiber qáwipsizlik qaǵıydalarına ámel etiwge shaqırdı. Sonday-aq, jaslar arasında onlayn aldawshılıq qurbanları bolıp qalmaw ushın qanday ilajlar kóriw kerek ekenligi boyınsha da usınıslar berildi.

Sonday-aq, ilaj dawamında real turmıstan mısallar keltirilip, kiberhújimler hám olardıń aqıbetleri haqqında túsinikler berildi. Internettegi belgisiz saytlar hám jalǵan akkauntlar arqalı tarqatılıp atırǵan jalǵan maǵlıwmatlar, virtual maydanda júz berip atırǵan nızamsız jumıstıń aldın alıw boyınsha da usınıslar berildi.

Bul ilaj jaslardıń kiber qáwipsizlik baǵdarındaǵı xabardarlıǵın arttırıw, olardıń virtual dúnyadaǵı jumısın jáne de qorǵawǵa járdem beriw maqsetinde shólkemlestirildi. Ilaj juwmaǵında qatnasıwshılar óz pikir-usınısların bildirip, bunday úgit-násiyatlaw ilajları turaqlı túrde ótkeriliwi kerek ekenligin atap ótti.

Este saqlań, hár birimiz kiber mákanda óz qáwipsizligimizdi támiyinlew ushın juwapkermiz! Kiberjınayashılıqqa qarsı gúres – bárshemizdiń minnetimiz!