Berdaq atındaǵı Qaraqalpaq mámleketlik universitetinde Ózbekstan Respublikası Ilimler akademiyasınıń haqıyqıy aǵzası, belgili ilimpaz, akademik Xolboy Ibraimov penen ushırasıw bolıp ótti. Bul ilajda professor-oqıtıwshılar, ilimiy izertlewshiler hám student-jaslar qatnastı. Ushırasıwdı universitettiń oqıw isleri boyınsha prorektorı O.Duysenbaev alıp bardı.
Ushırasıw dawamında akademik Xolboy Ibraimov mámleketimizde ilim hám bilimlendiriw tarawında alıp barılıp atırǵan keń kólemli reformalar, ilimiy izertlewlerdiń jámiyet rawajlanıwındaǵı ornı hám jas ilimpazlar ushın jaratılıp atırǵan imkaniyatlar haqqında aytıp ótti. Ol óziniń ilimiy jumısı, izertlew baǵdarları hám jıllar dawamında erisilgen nátiyjeleri menen bólisip, ilim tarawında jetik qánige bolıw jolındaǵı áhmiyetli principlerdi atap ótti.
Sonday-aq, akademik jaslardı ilimiy izleniwlerge jedel tartıw, olardıń innovaciyalıq pikirlewin qáliplestiriw, jańa ilimiy ideyalardı ámeliyatqa engiziw sıyaqlı máselelerge ayrıqsha itibar qarattı. Sonıń menen birge, zamanagóy ilimniń rawajlanıwınıń áhmiyetli baǵdarları, xalıqaralıq ilimiy birge islesiwdiń áhmiyeti hám jas izertlewshiler aldında turǵan wazıypalar haqqında tolıq maǵlıwmat berdi.
Ilaj dawamında studentler ózlerin qızıqtırǵan sorawlar menen akademikke múrájat etti. Soraw-juwap procesinde Xolbay Ibraimov jaslardı óz ústinde tınımsız islew, ilimiy izertlewlerde belsene qatnasıw hám jámiettiń rawajlanıwına úles qosıw jolında izleniwge shaqırdı. Ushırasıw sońında universitettiń professor-oqıtıwshıları hám studentleri menen keleshektegi ilimiy birge islesiw perspektivaları boyınsha pikir alısıldı. Bunday ilajlar jaslardıń ilimiy potencialın arttırıw, olarda ilimge bolǵan qızıǵıwshılıqtı jáne de kúsheytiw hám jetik qánigelerdi tayarlawda úlken áhmiyetke iye ekeni atap ótildi.
