Búgin, 21-fevral kúni Berdaq atındaǵı Qaraqalpaq mámleketlik universitetinde «Rektor hám jaslar» atamasında ushırasıw bolıp ótti. Onda universitet rektorı, akademik Axmed Reymov, universitettiń barlıq prorektorları, bólim baslıqları hám student-jaslar qatnastı. Ilajdı universitet rektorı Axmed Reymov ashıp berdi. Ol óz sózinde usı jıldıń 14-fevral kúni Húrmetli Prezidentimiz tárepinen mámleketimiz jasları menen ótkerilgen ushırasıwǵa toqtap ótip, onda jaslarǵa jaratılıp atırǵan keń imkaniyatlar hám bilimlendiriw tarawında ámelge asırılıp atırǵan reformalar haqqında sóz etti.

Rektor jaslardıń ilimiy izleniwleri, baslamaları hám keleshek rejelerine ayrıqsha itibar qaratıp, universitet basshıları tárepinen studentlerdi hár tárepleme qollap-quwatlawǵa tayar ekenligin atap ótti. Sonday-aq, ushırasıwda universitette studentler ushın jaratılǵan sharayatlar haqqında sóz etildi. Ushırasıw eki formatta shólkemlestirildi. Dáslep ulıwma sáwbetlesiw túrinde student-jaslardıń pikir hám usınısları tıńlanǵan bolsa, ekinshi bólimi jeke tártipte studentler rektorǵa ózleriniń múrájatların bildirdi.

Sonday-aq, ushırasıwda student-jaslar ózlerin qızıqtırǵan sorawlar menen múrájat etiw imkaniyatına iye boldı. Tiykarınan bilimlendiriwdiń sapasın arttırıw, sabaq processlerin innovaciyalıq texnologiyalar járdeminde jetilistiriw, ilimiy joybarlarda qatnasıw imkaniyatların keńeytiw, sport hám mádeniy ilajlardı kóbeytiw sıyaqlı máseleler átirapında sorawlar hám usınıslar bildirildi. Studentlerdiń usınıs hám baslamaların dıqqat penen tıńlap, olardıń hár biri boyınsha tiyisli ilajlar kóriletuǵının atap ótti. Ushırasıw ashıqtan-ashıq sóylesiw ruwxında ótip, jaslar ushın paydalı boldı. Olardıń pikir-usınısları inabatqa alındı. Ilaj sońında rektor jaslarǵa oqıw hám izleniwlerinde tabıslar tilep, universitet basshıları bárqulla olardıń baslamaların qollap-quwatlawǵa tayar ekenligin jáne bir márte atap ótti.