Berdaq atındaǵı Qaraqalpaq mámleketlik universiteti Yuridika fakultetinde jaslardıń huqıqıy bilimlerin arttırıw, olardıń jámiyettegi huqıqıy sanasın qáliplestiriw hám jańa nızamlardıń áhmiyetin túsindiriw maqsetinde «Nızam ústinligi hám insan huqıqları» atamasında media-tur shólkemlestirildi. Onda Dene mádeniyatı fakulteti, Fizika fakultetleriniń tyutorları student-jasları ǵalaba xabar qurallarınıń wákilleri qatnastı.

Ilaj dawamında qatnasıwshılar mámleketimizde huqıqıy mámleket hám puqaralıq jámiyetin rawajlandırıw jolında ámelge asırılıp atırǵan reformalar, insan huqıqları menen erkinliklerin támiyinlew baǵdarındaǵı ilajlar haqqında tolıq maǵlıwmatlarǵa iye boldı.

Media-tur dawamında qatnasıwshılar Yuridika fakultetiniń zamanagóy úskenelengen kriminalistika laboratoriyasında bolıp, tergew processlerinde qollanılatuǵın texnikalıq qurallar, dálillerdi toplaw hám ekspertiza processleri haqqında tolıq maǵlıwmatlar aldı. Qánigeler tárepinen kriminalistikalıq izertlewler qalay ámelge asırılatuǵını, jınayıy hádiyselerdi ashıwda dálillerdi ilimiy analizlewdiń áhmiyeti túsindirildi. Studentler barmaq izlerin anıqlaw, jazba hújjetlerdi ekspertizadan ótkeriw hám basqa da tergew processleriniń tiykarǵı táreplerin ámeliy mısallar arqalı úyreniw imkaniyatına iye boldı.

Bunnan soń, qatnasıwshılar fakultette shólkemlestirilgen sud zalına barıp, sud processleriniń qalay shólkemlestiriliwi hám ámelge asırılıwı boyınsha maǵlıwmatlar aldı. Sud zalında sud májilisi qalay ótkeriliwi, sudyalardıń qarar qabıl etiw procesi, prokuror hám advokatlardıń roli haqqında túsinik berildi.

Ilaj sońında qatnasıwshılar nızam ústinligin támiyinlewde hár bir puqaranıń huqıqıy bilimge iye bolıwı áhmiyetli ekenligi haqqında pikir alıstı. Keleshekte bunday ilajlardı turaqlı shólkemlestiriw hám jaslar arasında huqıqıy bilimlerdi keńnen úgit-násiyatlaw boyınsha baslamalar alǵa qoyıldı. Media-tur jaslardıń huqıqıy sanasın rawajlandırıw, nızamlarǵa húrmet ruwxında tárbiyalaw hám ámeliy kónlikpelerin arttırıw jolında áhmiyetli qádem boldı.