Dóretiwshilik qábiletińizdi sınaqtan ótkeriw imkaniyatı. Sózdiń sıyqırlı kúshinen paydalanıp, tariyxtı sóyletiń, keleshekke sayaxat etiń, kewillerde milliy maqtanısh hám Watansúyiwshilik sezimlerin oyatıń!
Berdaq atındaǵı Qaraqalpaq mámleketlik universiteti, Ájiniyaz atındaǵı Nókis mámleketlik pedagogikalıq institutı, Qaraqalpaqstan jazıwshılar awqamı, Ózbekstan Jurnalistler awqamı Qaraqalpaqstan bólimi, Ózbekstan Kórkem óner akademiyası Qaraqalpaqstan bólimi, Qaraqalpaqstan teleradio kanalı mámleketlik mákemesi menen birgelikte Házirgi qaraqalpaq filologiyasınıń áhmiyetli máseleleri (Qaraqalpaq tili hám ádebiyatı qánigeliginiń 90 jıllıǵına baǵıshlanadı) atamasındaǵı xalıqaralıq ilimiy-teoriyalıq konferentsiyası aldınan «Ilham hám sóz qúdireti» atamasındaǵı Respublikalıq tańlawın járiyalaydı.
Tańlawdıń tiykarǵı maqseti: qaraqalpaq tili, ádebiyatı hám jurnalistikasınıń rawajlanıwına úles qosıw, jámiyette milliy ana tilimizdiń abırayın asırıw, belsendi dóretiwshilerdi qollap-quwatlaw hám xoshametlewden ibarat.
Tańlawǵa jazıwshı-shayırlar, jurnalistler, blogerler, qaraqalpaq tili hám ádebiyatı páni oqıtıwshıları, sonday-aq, qábiletli jaslar qatnasıwı múmkin. Qatnasıwshılar tiykarınan milliy tilimizdiń qádir-qımbatı, onı saqlaw hám jetilistiriw jolında alıp barılıp atırǵan keӊ kólemli reformalar, Qaraqalpaq tili hám ádebiyatı qánigeliginiń tariyxı, búgingi turmısı hám jetiskenliklerine ayrıqsha itibar qaratıwı kerek.
Tańlaw tómendegi nominatsiyalar boyınsha ótkeriledi:
Eń jaqsı poeziyalıq dóretpe
Eń jaqsı esse
Eń jaqsı maqala
Eń jaqsı videorolik
Eń jaqsı súwretlew óneri
Tańlawǵa 2025-jıldıń mart ayınan sentyabr ayına shekem bolǵan aralıqta ǵalaba xabar quralları hám internet tarmaqlarında járiyalanǵan materiallar usı jıldıń 15-sentyabr sánesine shekem qabıl etiledi.
Tańlawǵa kelip túsken miynetler tóreshiler quramı tárepinen bahalanadı. Hár bir nominatsiya boyınsha jeńimpazlar 1-, 2-, 3-dárejeli diplom hám qımbat bahalı estelik sawǵaları menen sıylıqlanadı.
Dóretiwshilik materiallar «Ilham hám sóz qúdireti» tańlawına dep kórsetilgen halda tómendegi mánzilge jiberilewi kerek:
Nókis qalası, Ch.Abdirov kóshesi 1-jay. Qaraqalpaq mnámleketlik universiteti 2-oqıw imaratı,
Baylanısıw ushın telefon: +998 90714 86 98, +99893.485 3151
