Búgin, 1-mart kúni Berdaq atındaǵı Qaraqalpaq mámleketlik universitetinde universitet keńesiniń gezektegi májilisi bolıp ótti. Bul májiliste universitet rektorı basshılıǵında prorektorlar, bólim baslıqları, fakultet dekanları, kafedra baslıqları hám ilimiy keńes aǵzaları qatnastı. Májilisti universitet rektorı, akademik Axmed Reymov basqarıp bardı. Májilis kún tártibinde bir qatar áhmiyetli máseleler kórip shıǵıldı.
Dáslep ilimiy ataqlarǵa talaban universitet professor-oqıtıwshılarınıń attestaciya hújjetlerin Joqarı attestaciya komissiyasına usınıw boyınsha universitet keńesi xatkeri J.Biyimbetovtıń málimlemesi tıńlandı. Bunnan soń, universitettiń ilimiy isler hám innovaciyalar boyınsha prorektorı I.Turdımambetov 2024-jılı universitette alıp barılǵan ilimiy-izertlew jumısları, innovaciyalar hám ilimiy-pedagogikalıq kadrlar tayarlaw boyınsha ámelge asırılǵan jumıslar haqqında málimleme berdi.
Ol óz bayanatında universitettiń ilimiy potencialın bunnan bılay da arttırıw, xalıqaralıq ilimiy joybarlarda qatnasıw hám jas ilimpazlardı qollap-quwatlaw baǵdarında ámelge asırılǵan jumıslar haqqında maǵlıwmat berdi. Sonday-aq, 2025-jılǵa mólsherlengen rejelerge de ayrıqsha toqtap ótip, 2025-jılı universitette ilimiy maqalalar sanın arttırıw, xalıqaralıq grant hám joybarlarda belsene qatnasıw jáne studentlerdiń ilimiy-izertlew jumısların qollap-quwatlaw tiykarǵı wazıypalardan biri ekenligin aytıp ótti.
Sonıń menen birge, májiliste universitet professor-oqıtıwshılarınıń qánigeligin arttırıw hám qayta tayarlaw boyınsha alıp barılǵan jumıslar boyınsha oqıw-metodikalıq basqarma baslıǵı Sh.Eshmuratovtıń bayanatı tıńlandı. Ol universitet professor-oqıtıwshılarınıń bilim hám kónlikpelerin arttırıw maqsetinde alıp barılıp atırǵan jumıslar haqqında aytıp ótti. Májilis dawamında jınayashılıqqa qarsı gúresiw hám huqıqbuzarlıqlardıń aldın alıw boyınsha universitette ámelge asırılıp atırǵan jumıslar haqqında universitet profilaktika inspektorı I.Erejepovtıń bayanatı tıńlandı.
Profilaktika inspektorı I.Erejepov studentlerdiń huqıqıy sanasın arttırıw, jınayashılıqqa qarsı gúresiwde nátiyjeli usıllardı engiziw hám huqıqbuzarlıqlardıń aldın alıw baǵdarında alıp barılıp atırǵan ilajlar haqqında tolıq maǵlıwmat berdi. Sonday-aq, universitet aymaǵında qáwipsizlikti támiyinlew, studentlerdiń huqıqıy bilimlerin arttırıw hám profilaktikalıq ilajlardı jáne de keńeytiw boyınsha jańa rejeler tanıstırıldı.
Májilis juwmaǵında universitet rektorı Axmed Reymov qatnasıwshılarǵa minnetdarshılıq bildirip, aldaǵı rejelerdi ámelge asırıw ushın barlıq bólim hám fakultet basshıların jáne de belsendilikke shaqırdı. Májiliste bildirilgen usınıslar tiykarında 2025-jıl ushın anıq rejeler islep shıǵılıwı hám ámelge asırılıwı áhmiyetli ekenligi atap ótildi.
