2020-jılı Berdaq atındaǵı Qaraqalpaq mámleketlik universiteti «Elektr energetikası» kafedrası quramında eki kafedra shólkemlestirildi: Olar «Elektr energetikası» kafedrası hámde «Elektr texnikası hám metrologiya» kafedraları bolıp ashıldı. 2020-jıl 2-oktyabrda Berdaq atındaǵı Qaraqalpaq mámleketlik universitet kenesiniń qararına tiykaran shólkemlestirilgen kafedra quramına «Elektr energetikası» kafedrasınan jami 13 professor-oqıtıwshı ótkerilgen bolıp, sonan 1 texnika ilimleri filosofiya doktorı (PhD), 2 ulken- oqıtıwshı, 6 assistent- oqıtıwshı, 4 stajyor- oqıtıwshı hámde bul jańadan shólkemlestirilgen kafedra baslıǵı wazipasın waqtınsha atqarıwshı etip texnika ilimleri filosofiya doktorı (PhD) Abubakirov Azizjan Bazarbayevich usunıldı. 2020-jıl 9-noyabrdegi Berdaq atındaǵı Qaraqalpaq mámleketlik universitet kenesiniń qararına tikaran Abubakirov Azizjan Bazarbaevich usı kafedra baslıǵı retinde jumıs alıp barmaqta.

Házirgi kunde kafedrada 14 professor-oqıtıwshı islep atır, olardıń ishinde 1 texnika ilimleri filosofiya doktorı (PhD) (A.Abubakirov), 2 ulken-oqıtıwshı(K.Najmatdinov, A.Esenbekov), 6 assistent- oqıtıwshı (M.Bekimbetov, U.Utegenov, R.Tanatarov, Z.Kurbanbaeva, R.Seytimbetov, B.Ametova), 7 stajyor-oqıtıwshı (B.Jumamuratov, N.Jumaniyazova, R.Tanirbergenov, I.Gayipov, T.Kurbaniyazov, G.Sattarbergenova, R.Keńesbaev). 

Kafedranıń professor-oqıtıwshıları jańa pedagogikalıq texnologiyalardı esapqa alıp, hár jılı leksiya tekstlerin, ámeliy hám laboratoriyalıq jumıslardıń materialların qayta qarap shıǵıp, jańalap baradı. Kafedranıń barlıq pánleri boyınsha elektron leksiya tekstleri dүzilip, universitettiń málimleme-resurs orayına tapsırılǵan. Zamanagóy pedagogikalıq texnologiyalar tiykarında sabaqlar laboratoriya uskeneleri, elektron doskalardan hám prezentatsiyalardan paydalanılıp ótiledi. Magistratura qánigeligi ushın islep shıgarıw xam bólistiriwdin jańa texnologiyası páni ótiledi.

Professor-oqıtıwshılar ziyrek studentler menen birge turaqlı tүrde ilimiy-izertlew jumısların orınlaydı. Bunday studentler hár jılı respublikalıq olimpiadalarǵa hám hár qıylı tańlawlarǵa qatnasıp, jaqsı nátiyjelerge erisip kiyatır. Atap aytqanda A.Allakulieva 3-kurs metrologiya, standartlastıw hám ónim sıpatı menejmenti qánigeligi studenti respublikalıq olimpiadasına qatnasıp, 1-dárijeli diplom menen sıylıqlandı, SH.Kuatova 3-kurs metrologiya, standartlastıw hám ónim sıpatı menejmenti qánigeligi studenti Qazaqstan respublikasında ótkerilgen xalıq aralıq konferensiyasında qatnasıp «2021-jıldıń eń jas alımı» naminatsiyasında sıylı 1-orındı iyeledi.

Zaman talabına sáykes jetik qánigelerdi tárbiyalawda studentlerdiń ana tilinde jazılǵan oqıw ádebiyatlarınıń үlken áhmiyetke iye ekenligin esapqa alıp, kafedranıń tájiriybeli hám jetekshi professor oqıtıwshıları kóp sanlı sabaqlıqlar, oqıwlıq qollanbalar, ilimiy-metodikalıq ádebiyatlar jaratıp kelmekte.

Ǵárezsizlik jıllarında tálim-tárbiya jumıslarınıń sapasın jaqsılaw, studentlerdi házirgi zaman talaplarına sáykes tárbiyalaw jumısları jaqsı jolǵa qoyılǵan. Prezidentimizdiń shıǵıp sóylegen sózleri hám bayanatların, pármanların hám qararların, jańadan shıqqan nızamlardı studentler arasında keń үgit-násiyatlaw jumısları aldın-ala dүzilgen jobalar boyınsha turaqlı tүrde ótkerilip atır. Studentlerde tuwılǵan jerge, Watanǵa sүyiwshilik sezimlerin hám joqarı insanıylıq pazıyletlerdi oyatıw, tárbiyalaw boyınsha keń kólemli jumıslar alıp barılmaqta.

Kafedrada hár  turli atamalarda hár ayda kafedra oqıtıwshıları hám ziyrek studentelerdiń qatnasıwında seminar ótkeriledi.

Kafedra tálim-tárbiya jumıslarınıń sapasın barǵan sayın arttırıw, ilimiy-izertlew jumıslarınıń nátiyjeliligin joqarı mamanlıqtaǵı pedagogikalıq kadrlardı sistemalı tárbiyalawdı iske asırıw maqsetinde elimizdiń hám sırt ellerdiń belgili joqarı oqıw orınları, ilimiy-izertlew institutları menen tıǵız baylanısqa iye. Moskva politexnika Instituti, «YoDJU» texnikalıq institutı Tashkent filialı, Tashkent mámleketlik texnika universiteti, Tashkent informatsiyalıq texnologiyalar universitetleri sáykes kafedraları menen shártnamalar duzip, tıǵız qarım-qatnaslar jasalmaqta.

Atap aytqanda, kafedrada Tashkent mámleketlik texnika universiteti «Elektrotexnika» kafedrası professorı t.i.d. M.Ibodullaev, «Metrologiya, standartlastıw hám sertifikatlastırıw» kafedrası baslıǵı professor t.i.d.  P.M.Matyakubova, «Metrologiya, standartlastıw hám sertifikatlastırıw» kafedrası dotsenti t.i.k. M.M.Masharipov hám Tashkent informatsiyalıq texnologiyalar universitetleri «Energiya táminlew sisteması» kafedrası baslıǵı professor t.i.d. I.X.Siddikovlar qosa islew tiykarında jumıs islep atır.  

Ilimiy izertlew jumıslarınıń nátiyjeleri boyınsha 30 dan aslam ilimiy maqala hám tezisler, solardan 10 nan aslamı shet el jurnallarında baspadan shıqtı. Kafedra oqıtıwshıları tárepinen 2 oqıw-metodikalıq qollanba bastırıp shıǵarılıp, házir studentler olardı keńnen paydalanbaqta.

Házirgi waqıtta kafedra professor-oqıtıwshılarınıń ilim-izertlew jumısları temaları tastıqlanıp olar ustinde jumıslar alıp barmaqta.

Kafedrada ruwxıylıq hám aǵartıwshılıq jumısları boyınsha da bir qatar jumıslar islenip atır. Atap aytqanda ǵárezsizlik bayramı, 8-dekabr‒Ózbekistan Respublikasınıń Konstitutsiya kүnine, 14-yanvar‒Qurallı kүshler kүnine, 8-mart‒hayal-qızlar bayramına, xalqımızdıń milliy bayramı Nawrız bayramlarına arnalǵan bayram kesheleri ótkerilip turıladı. Bul keshege kafedramızdıń jası үlken ardaqlı professor-oqıtıwshıları mirát etiledi.

Kafedrada islep atırǵan ilimiy dárejeli professor-oqıtıwshılar

Abubakirov Azizjan Bazarbaevich, texnika ilimleri filosofiya doktorı (PhD). 1990-jılı 13-Iyunda Xojeli qalasında tuwılǵan. 2013-jılı Tashkent temir jol injenerleri institutınıń elektr táminatı qániygeligin tamamlaǵan. 2017-2020-jıllar aralıǵında Tashkent mámleketlik texnika universiteti hám  Qaraqalpaq mámleketlik universitetlerinde ilimiy-izertlew jumısların alıp bardı. 2020-jılı «Qayta tiklanuvchan energiya manbali elektr ta’minoti tizimlari reaktiv quvvati boshqaruvining ko’p fazali toklari datchiklarining modellari va tuzilish tamoyillari» temasında texnika pánleri boyınsha filosofiya doktorlıq dissertatsiyasın tabıslı jaqladı. 2020-jıldan «Elektr texnikası hám metrologiya» kafedrası baslıǵı lawazımında islep kelmekte. Onıń 40 dan aslam ilimiy miynetleri baspada járiyalandı. 1 oqıw qollanba, 6 oqıw-metodikalıq qollanbası, 25 ten aslam ilmiy maqalaları xalıq aralıq hámde Respublika kólemindegi jurnallarda baspadan shıqqan.