Mine usı atamada Berdaq atındaģı Qaraqalpaq màmleketlik universitetinde Hayal-qızlar maslahat keńesi tamanınan sàwbetlesiw, onlayn ushırasıw shólkemlestırildi. Ushırasıwda, rektordıñ hayal-qızlar màseleleri boyınsha màslahatshisi I. Seytnazarova kiris sóz sóylep, bul ilajdı shólkemlestiriwdiñ àhmiyeti, jàmiyetimizde, màhalle hàm shañaraqlarda qanshelli hayal-qızlardıñ ilimli, bilimli hàm sonıñ menen birge milliy mentalitetimizge tàn pazıyletlerin jetilistiriw búgingi dàwirdiñ aktual màselelerinen dep atap ótti.
Ilajģa Qaraqalpaqstan Respublikası màhàlle hàm shañaraqtı qollap-quwatlaw ministrliginiñ birinshi orınbasarı M. Axmedova, Qaraqalpaqstan Respublikası Àdillik ministrligi bas màslahatshisi N.Qutlımuratova, Nókis qalası medicinalıq birlespesi baslıģınıñ Analıq hàm balalıqtı qorģaw boyınsha orınbasarı M.Sultamuratova, Nókis qalası «Amanlıq gúzarı» MPJ belsendisi G. Jaqsımova, QMU Milliy ideya, ruwqıylıq tiykarları hàm huqıq tàlimi kafedrası baslıģı, siyasıy ilimler doktorı A.Bayrievalar spiker, Hayal-qızlar keńesi baspa sóz xatkeri Dilafruz Obloqulova moderator sıpatında, Respublika JOO hayal-qızlar màseleleri boyınsha màslahat keñesi aģzaları menen QMU hayal-qızlar màslahat keñesi aģzaları hàm student qızlar qatnastı.
Sonday aq, hàr bir shıģıp sóylewshi spikerlerimizden QR Màhalle hàm shañaraqtı qollap quwatlaw ministriniñ birinshi orınbasarı M.Axmedova, siyasiy ilimler doktorı A. Bayrieva hàm MPJ belsendisi kópti kórgen àdiwli ustaz G.Jaqsımovalar hayal-qızlardıñ tàrbiyasına tikkeley baylanıslı ilimiy hàm turmıslıq tereñ mazmunģa iye, pikirlerin, mısallar tiykarında bayan etken bolsa, huqıqıy, medicinalıq baģdarda qatnasqan spikerlerimiz N.Qutlımuratova, M. Sultamuratovalar bugingi kúnde nızamshılıqta hayal-qızlarģa berilip atırģan imkaniyatlar tiykarında nızamlı màpleriniñ tàmiyinleniwi haqqında aytıp sonıñ menen qatar sonsha imkaniyatlarģa qaramastan hayal-qızlar arasında bir qatar jınayatlardıñ kóbeyip baratırģanlıģın sınģa aldı. Jasırarlıģı joq soñģı waqıtları natınısh shañaraqlardıñ kóbeyiwi, usı tiykarda ajırasıwlardıñ da artıp atırģanlıģı ashınarlı jaģday, mine usı jaģdaylardı kemeytiw boyınsha keñ jàmiyetshilik penen tıģız jumıs alıp barıw zàrùrligi bildirildi. Jàne de, hayal-qızlar arasında medicinalıq màdeniyattı jetilistiriw baģdarında qànigeler tàrepinen elimizde àmelge asırılıp atırģan ilajlar sóz etilip qatnasıwshılarģa bir qansha pikir-usınıslar bildirildi.
Ùsh saat dawam etip, uzaqtı jaqın etken onlayn ushırasıw soraw-juwaplar menen mazmunlı ótti hàm aldaģı wazıypalar belgilep alındı.
Berdaq atındaģı QMU hayal-qızlar másláhát keńesi
