Búgin Qaraqalpaq mámleketlik universiteti Biologiya fakultetinde Ózbekstannıń Parijdegi elshixanası tárepinen eki mámleket jaslarınıń óz-ara almasıp oqıwın jolǵa qoyıw, qorshaǵan ortalıq hám ekologiya tarawında óz-ara tájriybe almasıw máselelerin dodalaw maqsetinde Franciyanıń xalıqaralıq birge islesiw hám tálim (ASIE) shólkemi wákilleri hám Franciya universitetlerinde tálim alıp atırǵan studentlerden ibarat delegaciya miymanda boldi.

           Sol múnásibet penen Biologiya fakultetinde “Shıǵındısız jasıl tábiyatta jasaymız” atamasında keń shen`berdegi ushırasıw shólkemlestirildi. Ushırasıwda shet elli miymanlar menen birge Oliy majlis deputatı L.Seytova, Ministrler Ken`esi baslıǵı orınbasarı, Qaraqalpaqstan Respublikası ekologiya hám qorshaǵan ortalıqtı qorǵaw komiteti baslıǵı hám juwapker qánigeleri, Qaraqalpaq mámleketlik universiteti Biologiya fakultetiniń professor oqıtıwshıları hám ekolog studentler qatnastı. Ilajdı Biologiya fakulteti dekanı b.i.d., professor Ya.Ametov ashıp berdi. Onnan soń ASIE shólkeminiń baslıǵı  Elodie Caumont shólkem haqqında maǵlıwmat, sonday-aq, shólkem aǵzalarınıń bul jerge keliwden maqsetin ushırasıw qatnasıwshılarına túsindirip berdi.

          Ushırasıw dawamında fakultet átirapına terek nálleri egildi. Onnan keyin ilaj qatnasıwshıları 5 toparǵa bólinip shıǵındılardı jıynaw jumısların alıp bardı. Shıǵındılardı jıynaw ushın 1 saat waqıt ajıratılıp, sol waqıt ishinde eń kóp shıǵındı toplaǵan eki toparǵa shólkem tárepinen tayarlanǵan sawǵalar tapsırıldı. Ushırasıw sońında bolsa shet elli studentler óz mámleketinde shıǵındılardıń qalay jıynalıwı, olardı qayta islew jumıslarınıń qay tártipte shólkemlestirilgenligi, plastik paketlerdiń ornına qaǵaz hám gezlemeden tayarlanǵan sumkalardıń isletiliwi, bizde bir mártelik paydalanılatuǵın ayrım buyımlardıń kóp márte paydalanıwǵa jaramlı bolǵan túrleriniń jaratılǵanlıǵı  haqqında maǵlıwmat berdi hám ózleri menen alıp kelgen buyımların kórsetti.

Búgingi ushırasıw miymanlardıń tábiyat haqqındaǵı qosıqları menen qızǵın dawam etti.

Aygerim Naǵashıbayeva
Biologiya fakulteti “Ekologiya hám topıraqtanıw” kafedrası assistenti;